இரு கோடுகள்

சென்ற வாரம், தொலைந்து போன ஓட்டுனர் உரிமத்துக்கு மாற்று உரிமம் பெறுவதற்காக எங்கள் வீட்டருகே உள்ள போக்குவரத்துத் துறை அலுவலகம் சென்றிருந்தேன். நான் அங்குதான் எடுத்திருந்தேன். அப்போது அது கோவை-வடக்கு அலுவலகமாக இருந்திருக்கும் போலிருக்கிறது. ஆனால், இப்பொது கோவை-வடக்கு வெள்ளக்கிணறு அருகில் மாற்றப்பட்டுவிட்டது. என்னை அங்கே அனுப்பினார்கள். இரண்டு பேருந்துகள் மாற்றி அங்கே சென்றேன். (ரூ.4+ரூ.13). அங்கே 11 மணிவரைதான் விண்ணப்பங்களை ஏற்றுக்கொள்வார்கள் என்றிருந்தது. இப்போது இணையத்தில் தான் விண்ணப்பிக்க வேண்டும் என்று இணையதள முகவரி ஒன்றும் இருந்தது. (parivahan.gov.in). உடன் ரூ.20 பத்திரத்தில் ஏதோ விண்ணப்பம் வேண்டும், மருத்துவச் சான்றிதழ் வேண்டும் என்றெல்லாம் இருந்தது. ஆனால், இணையத்தில் நான் தேடிய போது, தமிழ்நாடு போக்குவரத்துத் துறை தளத்தில் வேறு ஒரு வழிமுறை கொடுக்கப்பட்டிருந்தது. இணைய தள விண்ணப முறை பற்றி அந்தத் தளத்தில் எதுவுமில்லை. பழைய தளமாக இருக்கவேண்டும். விசாரித்தபோது, அங்கிருந்த அறிவிப்புப் பலகையைப் பாருங்கள் என்பதற்கு மேல் எந்த பதிலும் பெறமுடியவில்லை. மகிழ்ச்சி. எதுவும் செய்யாமல் வீடு திரும்பினேன். இம்முறை காந்திபுரம் செல்ல எதிர்திசைப் பேருந்தில் ஏறினேன். (ரூ.15). அரசாங்க அலுவல் அதற்குள்ளாக முடிந்துவிடும் என்ற நம்பிக்கை எனக்கு இருக்கவில்லை என்பதால், மனதில் ஒரு வெறுமைதான் இருந்தது. ஏற்கனவே, இந்த உரிமம் தொடர்பாக காவல்துறை சான்றிதழ் பெறுவதற்காக ஆறேழு முறைகள் சிங்கநல்லூர் சென்று வந்த அனுபவம் இருந்தது. (இப்போது அதற்கும் இணையதள வசதி வந்துவிட்டது. எப்படிச் செயல்படுகிறது என்று பார்ப்போம்.)

நெருங்கிய நண்பர் ஒருவர், 2000 ரூபாய் கொடுத்தால், எந்த ஓட்டுநர் பயிற்சிப் பள்ளியிலும் இந்த வேலையை அலைச்சல் இல்லாமல் செய்து கொடுத்துவிடுவார்கள் என்று அக்கறையுடன் சொன்னபோது, நானே எடுத்துவிடுவேன் என்று கூறியிருந்தேன். நேரடியாகவோ மறைமுகமாக லஞ்சம் கொடுக்காமல் ஒரு செயலைச் செய்து முடிக்க நாம் தர வேண்டிய விலை அலைச்சலும் மன உழைச்சலும். அந்த அலைச்சலையும் மன உழைச்சலையும் உச்சப்படுத்துவதற்கான செயல்முறைகளை வடிவமைப்பதில் நம் அரசு அமைப்புகள் அசாத்திய தேர்ச்சி பெற்றுள்ளன. இதனாலேயே இந்த வேலைகளையெல்லாம் முடிந்தவரை செய்யாமல் தள்ளிப்போட்டுவிட்டு, ஊழலற்ற தேசம் பற்றி கனவு காண்பதற்காக தூங்கப்போய்விடுகிறோம்.

பேருந்தில் வீட்டுக்கு வரும் வழியில், இரண்டு பெண்மணிகள் தமது தோள்களில் ஆளுக்கொரு குழந்தையுடன் பேருந்தில் ஏறினார்கள். வறுமையும் அறியாமையும் சமூகநிலையும் முகத்திலும் உடையிலும் பேச்சிலும் தெரிந்தன. குழந்தைகள் மெலிந்திருந்தனர். இருவரும் நடத்துனரிடம் காந்திநகர் போகுமா என்றனர். இல்லையென்றதும் காந்திபுரத்துக்கு 2 பயணச்சீட்டு கேட்டனர். இளையவள் முப்பது ரூபாயை நீட்டினார்.

‘அந்தக் குழந்தைங்களுக்கு எடுக்கலையா?’ என்றார் நடத்துனர், கடுமையுடன்.
‘அவங்களுக்கும் எடுக்கணுமாங்க?’ என்றார் முதியவள்.
‘இந்தப் பாப்பாவுக்கு என்ன வயசாகுது?’
‘மூணு இருக்கும்ங்க,’ குத்துமதிப்பாகச் சொல்கிறார் என்று புரிந்தது. குழந்தையின் வயது தெரியவில்லை. ஆனால், அதன் மெலிந்த உடலில் மூன்று ஆண்டுகளின் தடயம் இல்லை.
‘மூணு வயசாச்சுனா டிக்கெட் எடுத்தாகணும். இதோட வயசென்ன?’ அடுத்த குழந்தையைக் காட்டிக் கேட்டார்.
அந்தக் குழந்தை முந்தைய குழந்தையை விடவும் மெலிருந்தாள். நடுத்தர வர்க்கமாக இருந்தால், சட்டென்று 2 வயது என்று பதில் வந்திருக்கும்.
‘அவளுக்கும் மூணு வயசிருக்கும்ங்க,’ இன்னொரு உத்தேசமான பதில்தான் வந்தது.
‘ரெண்டு பேருக்கும் டிக்கெட் எடுங்க. 56 ரூபா ஆகும். இல்லைனா இறங்கி வேற பஸ்ஸுல வாங்க.’
மறுபேச்சில்லாமல், ஒரு 100ரூபாய்த் தாளைத் தேடி எடுத்துத் தந்தார்.
‘நாங்க புதுசுங்க. எங்க எறங்கணும்னு எங்களுக்குத் தெரியாது. இடம் வந்தா சொல்லுங்க,’ என்றார். நடத்துனரிடம் பதிலேதும் இல்லை. இன்னும் இரண்டுமூன்று மெல்லிய குரலில் கேட்டபோதும், அவர் காதில் வாங்கிக்கொண்ட மாதிரித் தெரியவில்லை.
‘எல்லாரும் அங்கதான் இறங்குவாங்க. கடைசி ஸ்டாப் தான்,’ என்று நான்தான் சொல்லவேண்டியிருந்தது.

அவர்கள் செல்லவேண்டிய காந்திநகர் எதுவென்று எனக்கும் தெரியவில்லை. விசாரித்துச் சென்றுவிடுவார்கள் என்றுதான் நம்பவிரும்பினேன். அது எந்த இடமாக இருந்தாலும், சொகுசுப் பேருந்தாக இல்லாமல் சாதாரணப் பேருந்தாகவும், இவ்வளவு பிடிவாதமான விதிமுறைக்கார நடத்துனராக இல்லாமலும் அமையும் என்றும் நம்பிக்கொண்டேன்.

எங்கள் கிராமத்தில் ஒரு பெண் ஊழியருக்கான தினக்கூலி 180ரூ.

எத்தனைதான் ஊழல், சிகப்பு நாடா என்று நடுத்தர வர்க்கம் புலம்பினாலும், பெரும்பாலான தேர்தல்களில் இவை முக்கியப் பிரச்சனைளாக இருப்பதில்லை. அவற்றின் அருவே வேறு பெரிய கோடுகள் உள்ளன.

Advertisements

மறுமொழியொன்றை இடுங்கள்

Fill in your details below or click an icon to log in:

WordPress.com Logo

You are commenting using your WordPress.com account. Log Out / மாற்று )

Twitter picture

You are commenting using your Twitter account. Log Out / மாற்று )

Facebook photo

You are commenting using your Facebook account. Log Out / மாற்று )

Google+ photo

You are commenting using your Google+ account. Log Out / மாற்று )

Connecting to %s

%d bloggers like this: