பரிசோதனை

அலுவலக நுழைவாயிலில்

தினமும் காருக்குப் பரிசோதனை.

முனையில் கண்ணாடி பதித்த

நீளஇரும்புக்கம்பியை அடியிலிட்டும்

கார்-டிக்கியைத் திறந்தும்.

வெடிகுண்டுகள் வேறெங்கும்

வைக்கப்படுவதில்லை போலும்.

 

நிலம் பிளந்து விழுங்கிய

சில லட்சம்பேர்;

அலைமலைகள் அழைத்துச்

சென்ற ஆயிரங்கள்;

நெரிசலில் நொருங்கிய

நாளங்கள் உடல்கள் ;

பெருநெருப்புக் கருக்கிய

கசங்கிய சீருடைகள்,

சீருடைக்குள் சிறார்கள்;

சீறிப்பாயும் எந்திரஎருமைகள்,

எங்கேயும் படர்ந்திருக்கும் எமன்;

கம்பிமுனையில் பதித்த கண்ணாடிக்குள்

எதன் பிம்பம் தெரிந்ததோ?

திறந்த கார்-டிக்கிக்குள்

எதன் வரவைக் கண்டானோ

அந்தக் காவலாளி?

 

வெடிகுண்டு கிடைக்காத ஏமாற்றத்தில்

போகலாம் என்று கையசைத்தான்.

தினமும்.