வசதியின் வலி

பள்ளியில் விட்டுச்செல்ல
மகளை ஒருகையிலும்
அவள் செருப்பை மறுகையிலும்
பள்ளிப்பையை ஒரு தோளிலும்
என் மடிகணினிப்பையை மறு தோளிலும்
சுமந்தவாறு லிஃப்டிலேறியிறங்கி
ஹோண்டா காரிலேற்றி
ஓட்டிச் செல்கிறேன்.
சகதிபடிந்த சாலையைக் கடக்கக்
காத்திருக்கின்றனர் இரு சிறுமியர்:
நைந்த பைகளும்
வெளிறிய சீருடையும்
வெறுங்கால்களுமாய்.
வெயில்வர வெகுநேரமில்லை.